Venom (movie review) 2018

كَتبهفي 4 ديسمبر 2018

لو لســــه ماشوفتش التريلر، شوفه من هنا <3 :

خليني أدردش وياكم عن الفيلم، الفيلم بطولة توم هاردي (فينوم طبعاً أو إيدي بروك)،وميشيل ويليامز، وريز أحمد.. بيرجع توم هاردي لشاشات السينما بعد The revenant وصدقوني لما أقول إن توم هاردي أصبح أكثر نجاحاً مع الزمن وأكثر وسامة كمان 😉 .. الفيلم بيحكي عن شخص عبقري ورجل أعمال كبير جداً (مستر كارلتون) إللي قام بدوره ريز أحمد الراجل ده إللي قرر يوصل بالعلم لأبعاد جديدة تماماً ويعمل تجارب على البشر بكائنات فضائية مجهولة سمّاها (سمبيوت)، لكن إيدي بروك (صحفي الفضائح) زي ما أحب أسميه، الشخص إللي بيحاول يحقق ذاته ونجاحه في وظيفته ولكنه بيحب الإستعراض أكتر بجرأته بيواجه مستر كارلتون، وبالصدفة البحتة بيتحول جسمه لمُضيف لواحد من السمبيوتس دول إللي هو (فينوم).

هتكلم على شوية نقط محددة منعاً للإطالة:

أولاً: الفيلم بينزل تحت مسمّى الـ anti-super heroes ويمكن ده هيبقى أحلى وأمتع فيلم آنتي سوبر هيروز إتعمل أو هيتعمل، وشهادتي فيه مش مجروحة، بل دي عن ثقة، لأن يكفي لنجاح وشعبية فينوم إن توم هاردي هو مؤدي الدور

ثانياً: الفيلم بيتصنف r- rated وده زي قانون ولكنه بيطبّق على الفنون المرئية بس، قانون بيقيّم المحتوى بتاع المحتويات المرئية ويحطه تحت سن معين، عشان كده بنلاقي أفلام +12 لغاية +21 بيبقى على حسب الـ rate ده للمحتوى، فيلم Venom واحد من الكثير من الأفلام الممتازة إللي ماكانتش r- rated بمعنى إن 30% من مشاهد الفيلم إللي كانت ممكن تكسبه طعم وقبول جماهيري أكبر إتحذفت لأنها غير ملائمة للمشاهد! وده طبعاً دسائس لعينة عشان الفيلم يقع، والدليل على ده إن سوني أنتجت الفيلم لوحدها! فيلم كبير زي ده..

اقرأ أيضاً  Now You See Me

ثالثاً: فيلم Venom لإي رأيي الشخصي هعتبره تريلر ممتاز لفيلم بجد، لأنه كان جرعة خفيفة أوي من حاجة أحلى وأكبر بكتير، ونداء شخصي مني لـ marvel إنها تتبنى الفيلم وتحطه في قائمتها الممتلئة والمزدحمة، ممكن؟ معلش! 😛

رابعاً: إتقالت جملة ” توم هاردي إللي شايل الفيلم” أكتر مما إتقال آراء على الفيلم بنزاهة، والحقيقة أنا ماشوفتش كده، ميشيل واحدة من ممثلاتي المفضلات برغم إنها مش ممثلة ممتازة ولكني بحبها عامةً، أدائها كان حلو (مش ممتاز ومش واااو) لكنه حلو ومناسب في مكانه يمكن كان محتاج زقة منها، أو من المخرج، أو السيناريو 😀

أما ريز أحمد فده واحد من ممثليّ المفضلين لفئة الشباب، من ساعة دوره الضئيل لكن المميز جداً في night crawler وأنا أقسم إني بدأت أدور عليه، وبالمناسبة أرشحلكم الفيلم ده 😉 أما عن أدائه في Venom فماعتقدش إن حد يليق بيه أكتر منه، وبرغم إنه مات إلا إني أتمنى أشوفه الأجزاء الجاية.

أخيراً: أنا نفسي أقول أكتر بس مش هكون جبت أي شئ جديد، لكن Venom فيلم ليه جماهيرية كبيرة، بعيداً عن إحباط المعجبين.. مبسوطة إن الفيلم مخذلنيش ولا كسرني بعد إنتظاري ليه كل الفترة دي.. أرشح إنكم تشوفوه وتقروا الريفيو تاني وتقولولي رأيكم..

مش هدي تقييم للفيلم، لغاية ما ينزل الفيلم إللي في خيالي فعلاً ^_^ ويبطلوا يخنقوا عليه بسبب دسائس

اقرأ أيضاً  المراجعة الثالثة: Guardians of the Galaxy Vol.2

IMDB إيدته: 7/10 و Rotten tomatoes إكتفت بـ29% للأسف

وإلى لقاءٍ آخر المراجعة الجاية بإذن المولى <3

التعليقات

التعليقات


آراء القراء

اترك تعليقك

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.


أكمل القراءة

Current track
Title
Artist

Background