البحث عن نيمو

كَتبهفي 30 مارس 2018

لما بتخسر جزء من عائلتك و ميبقاش فاضل فيهم غير شخص واحد , اكيد هتحاول تحميه بكل الطرق لانك مش عايز تخسره هو كمان و بتحبه ♥

و ممكن خوفك يبقى زيادة شوية زى السمكة “مرهف” فى فيلم “البحث عن نيمو” …

“مرهف” خسر زوجته و اولاده و مفضلش منهم غير واحد بس “نيمو” , اللى كان خايف عليه جداً و كان بيحاول يحميه كويس من الخطر او اى حاجة “مرهف” شخصياً خايف منها حتى المدرسة !
بس “نيمو” كان تعب و زهق من خوفه و من رعبه الزياده و خوفه من المحيط , و اتحداه و لمس مركب لما باباه فضل يقوله لأ و يرجع حالاً و كان هيرجع “نيمو” بعد ما لمس المركب لكن جه صياد و اخد “نيمو” …

وقتها اترعب “مرهف” و حاول يلحق المركب او يشوف راحت فين و يسئل السمك لو كان شافها , و سمكة اسمها “دورى” قالت له انها شافتها و عارفه مشي منين و راح عشان يشوفها مشيت منين مع “دورى” …

لكن بعد شويه هى نسيت , و نسيته هو اصلاً !

لأن هى كانت بتنسى كتير عندها فقدان ذاكره مؤقت , و جت سمكة قرش و شافتهم و هما طبعا خافو منها جدا لكن القرش كان بيحاول يبقى مُسالم  لكن مقدرش و كان هيكولهم بس عرفو يهربو منه بسرعه , و بالصدفه لقو حاجه ممكن توصلهم للمكان اللى فيه “نيمو” اللى بقى فى حوض سمك فى عيادة دكتور اسنان و العيادة دى كانت على البحر …

و الدكتور كان ناوى يدى السمكة الجديدة “نيمو لبنت اخته  “دارلا” هديه و وراله صورتها , و لما باقى السمك اللى مع “نيمو” فى الحوض سمعوا الكلام دا و شافوا الصورة  قالو لــ “نيمو” انها بنت مؤذية و مش بتتعامل مع السمك بلطف ابداً لأنهم عارفين البنت دى , و “نيمو” بقى خايف و مش عايز يروح لها و قال لهم انه لازم يرجع لباباه فى المحيط  , و الاسماك خافو على ” نيمو ” و قرروا يساعدوه و يعملوا خطه عشان يهرب و يهربوا كلهم قبل ما البنت تيجى !

الاسماك دول كانو يعرفو بجعة كانت بتيجى تتفرج معاهم على عمليات الدكتور و شافت “نيمو” …

اقرأ أيضاً  يا وردة ألمعى

اما “مرهف” و “دورى” فــ قابلتهم سمكة تانية كانت هتكلهم لكن “دورى” عرفت تقرأ العنوان اللى مكتوب على قناع الصياد اللى لقوه , و”مرهف” كان مشغول مع السمكة التانيه لكن عرفوا يتخلصو منها و يهربو برغم من انهم مش عارفين العنوان فين لكن “دورى” كانت مبسوطة انها افتكرت العنوان و حفظته حتى من غير القناع ♥
و فى طريق “مرهف” و “دورى” قابلو سمك و سألوهم على العنوان و دلوهم على الطريق و مشيوا زى ما قال لهم السمك لكن قابلو قناديل بحر و حاولوا يهربوا منهم و نجحوا لتالت مرة فى الهروب و التخلص من المخاطر …

و “نيمو” كان بيحاول ينفذ الخطة لكنه فشل و كان هيتعرض لخطر لكن باقى الاسماك اللى معاه عرفو ينقذوه , في الوقت ده “مرهف” كان قابل سلاحف البحر اللى ساعدوه و وصلوه لاقرب مكان ممكن من العنوان اللي كانوا عايزين يروحوه و حكى لهم عن حكايه ابنه و رحلته للبحث عنه …

و من السلاحف للاسماك لغاية الطيور حتى اللى بتبقى عند البحر الحكاية وصلت لكل دول , و من ضمن الطيور دى كان البجعة اللى تعرف السمك اللى فى عيادة الدكتور و لما سمع اسم “نيمو” لما وصلت له الحكاية راح عند عيادة الدكتور بسرعة و قالهم و “نيمو” مبقاش مصدق اللى بيسمعه دا و كل اللى حصل لباباه وكل المخاطر و اسماك القرش و قناديل البحر و كل اللى حصل معاه عشان يوصله , و قرر يحاول يعمل الخطة تانى و فعلاً نجح فى تنفيذ جزء منها لوحده و دا شجع باقى السمك انهم يكملوها ♥

و السلاحف كانو وصفو لــ “مرهف” و “دورى” يعومو ازاى عشان يوصلو للمكان اللى هما عايزينه لكن و هما بيعومو “مرهف” اكتشف انهم بيلفوا و مش ماشين صح و “دورى” قالت له ممكن يسألو حد لما شافت سمكة من بعيد لكن السمكة دى طلعت حوت وببساطه بلعهم !
و “مرهف” حاول كذا مره يخرج بس كان بيفشل و حس ان خلاص مافيش حل و كان زعلان لأنه وعد ابنه ان مفيش حاجة هتحصله لكن “دورى” استغربت من الوعد ده و قالت له ان مينفعش يمنع عنه اى حاجة تحصله و مينفعش مافيش حاجة تحصله و انها تبقى حياة مملة اوى !

اقرأ أيضاً  العسل للنحل و لا البشر؟

و قالت له كمان انه جه وقت الخروج و ان مافيش حاجة وحشه هتحصل و فعلاً عرفو يخروجو و وصلو للمينا فى “سيدنى” المكان المفروض فيه “نيمو” و المطلوب دلوقتى انهم يدوروا  على المركب اللى اخدت “نيمو” …

اما الدكتور فــ كان بيحاول يحط “نيمو” فى شبكة صغيرة لكن باقى الاسماك حاول يساعدو “نيمو” و دخلو كلهم فيها و وقعت الشبكة عشان كانت تقيلة و هما كانو بيعومو لتحت , لكن الدكتور جاب كيس و دخل فيه و بقى بره الحوض و “نيمو” حاول يهرب لكن فشل …

“مرهف” و”دورى” كانو لسه بيدوروا على المركب و جات بجعة و كانت هتكلهم لكن البجعة التانية اللى بتروح عند الدكتور شافتهم و لما سمعت “مرهف” بيقول انه لازم يلاقى “نيمو” البجعة عرفت انه السمكة اللى بيتكلموا عليها في المحيط , و قال لهم انه عارف ابنه فين و اخدهم و وصلهم للعيادة اللى كانت “دارلا” جايه تستلم هديتها “نيمو” لكن هو عمل نفسه مات عشان الدكتور يتخلص منه و يعرف يهرب و البجعة جات و دخلت جوا عند الدكتور قبل ما الدكتور يتخلص منه لكن “نيمو” ماكنش يعرف انها معاها باباه عشان كدا كان مكمل فى خطته لكن لما شافه “مرهف” كدا اتصدم و الدكتور خرج البجعة اللى كان معاها “مرهف” و “دورى”  و سمكة من الاسماك اللى فى الحوض خرجت و ساعدت “نيمو” و عرف يهرب و بقى فى مكان مايته هتصب فى المحيط …

لكن “مرهف” كان فاكر ان “نيمو” خلاص ضاع و كان هيمشى و يسيب “دورى” لكن هى ماكنتش عايزاه يمشى و قالت له ان مافيش حد فضل معاها كتير زيه كدا و ان و هى معاه بتفتكر حاجات و بتحس بالامان و مش عايزه الشعور ده يضيع منها ♥ مش عايزه تنسى و قالتله ميمشيش , لكنه مشى …
لكن “نيمو” المايه ودته للمكان اللى كان فيه “مرهف” و “دورى” وقتها كانت بتحاول تفتكر و حسيت انها نسيت حاج و لما شافها “نيمو” كدا حاول يساعدها و قال لها ان هو كمان بيدور على حد و ممكن يدوروا سوا و لما اتعرفوا ببعض و عرفت اسمه مفتكرتش !
لكن لما قرأت اسم “سيدنى” على حاجه فى المايه افتكرت كل حاجة و افتكرته  و افتكرت “مرهف” و عرفوا يوصلوله و لما شافه “مرهف” مصدقش نفسه و فرح جداً ♥

اقرأ أيضاً  1 Toy Story ( لعبتي المفضلة )

لكن كان فى مركب صيد تانى بس كانت منزلة شبكة كبيرة و دخل فيها سمك كتير من ضمنهم “دورى” , “نيمو” كان عايز يدخل جوا عشان يلاقى “دورى” و يحاول يخرجها بس “مرهف” ماكنش عايزه يدخل مش عايز يضيع منه تانى لكن “نيمو” قال له انه هيعرف يتصرف , و سابه يدخل “مرهف” كان عارف انه هيعرف يتصرف و بقت الخطة دلوقتى ان “مرهف” يقول للسمك من بره يعوموا لتحت و “نيمو” نفس الموضوع لكن من جوه و يلاقى “دورى” و الشبكة كانت قربت تطلع لكن السمك بقى يعوم لتحت و عشان هما كتير لما فضلوا يعوموا الشبكة مستحملتش و اتقطعت و خرج السمك كله لكن “نيمو” كان وقع واغمى عليه لكن كان كويس و لما راح له باباه “نيمو” قال له انه مش بيكرهو و من بعدها بقى “مرهف” هو بنفسه اللى يصحيه عشان يروح المدرسة و هو مبسوط و فرحان بيه و “نيمو” بقى يحبه اكتر و “دورى” كمان بقت معاهم ♥
الاب لو كان بيخاف علينا زيادة شويه فــ هو عشان بيحبنا و مش عايز حاجه وحشه تحصل لنا و حتى لو حصلت هيعمل اى حاجة و يستحمل اى حاجة او اى خطر عشان نبقى فى امان و مع بعض , كل يوم بيتعب و بيشتغل فيه بيبقى عشانا و عشان يضمن لنا حياة كويسة و امان و يعمل للمستقبل لازم نفهم دا و نقدره , الاب سند و امان و حب حتى لو مالوش يوم او مناسبة خاصة لازم نعبر له عن حبنا ليه و قيمته عندنا و لازم نبقى فاكرينه على طول لأن هو مش بينسانا ♥

التعليقات

التعليقات

الوسوم

آراء القراء

اترك تعليقك

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.


أكمل القراءة

Current track
Title
Artist

Background