زتوبيا (رحلة الحلم)

كَتبهفي 8 ديسمبر 2017

الاصرار …

حاجه عند ناس كتير بس اللي بيعمل بيها قليل جدا , لما يكون عندك حلم وهدف نفسك تحققه بس في نفس الوقت حواليك كل الاسباب اللي تحبطك وتخليك تعيد تفكير فيه تاني وكمان كل اللي حواليك بيقولوا مينفعش ومستحيل , هتكمل بردو في طريقك ؟!!

دي نفس الاسئلة والظروف اللي حصلت للضابطة “جودي هوبس” في زتوبيا , كان حلمها تبقى ضابطة في المدينة دي مع انها ارنبة وبالرغم من ان كل اللي حواليها قالولها مينفعش ارنبة تبقى ضابطة , حتى باباها ومامتها من خوفهم عليها …

لكنها استمرت وراحت زتوبيا , وللاسف الموضوع استمر هناك بردو لان محدش كان اقتنع بيها او باللي تقدر تعمله , عشان كده سلموها مهمة مخالفات المرور !!

لحد ماجتلها الفرصة اخيراً وبصعوبة … استلمت قضية البحث عن “ايميت قوندستون” وبمساعدة الثعلب “تيك” بدأت البحث واكتشفت ان الموضوع مش البحث عن مفقود بس , ده طلع ليه علاقة بتوحش الحيوانات المفترسة اللي المفروض انه انتهى من زمان وهيا كانت مقتنعه بده لكنه رجع فجأة بدون سبب وبعد ما كل الحيوانات كانت عايشة في سلام وتناغم من كل الفصائل بقى في قلق وخوف من الحيوانات المفترسة وده اللي خلا “تيك” يبعد عنها لانها افتكر انها متصورة انه ممكن يتوحش زيهم , لكن هيا مكنش قصدها كده وكل اللي حصل ده خلاها تغير رائيها وتستقيل وترجع بلادها بعد ماكانت هتاخد منصب كبير …

اقرأ أيضاً  Inside Out ( جُزر )

بس عرفت بالصدفة ان كمان ممكن الارانب تتوحش !!

عن طريق زهرة اسمها العاون ليلاً , ورجعت لــ “تيك” وحاولت تعتذرله وهو اخيراً سامحها , وعرفوا ان السبب في الموضوع كله العمدة الجديدة “بيل وذير” بعد ماكانوا شالوا العمدة القديم اللي كانوا فاكرين انه السبب في الموضوع وكمان هو مفترس مع انه كان بيحاول يعالجهم من بعيد ومن غير ماحد يعرف عشان منصبه وكمان ميعملش قلق في المجتمع …

واتقبض على بيل وذير بعد ماسجلتلها “جودي” كل اعترافتها , ورجعت تاني الشغل و”تيك” كمان بقى ضابط ورجع النظام في زوتوبيا زي ماكان …

لو متقبلناش بعض مش هنتقدم ولا هنحقق حاجه لان اختلافنا هو اللي بيميزنا وبيكملنا وبيخلينا نعمل حاجات جديدة ونطور ولكن من غير مانظلم بعض , لازم كمان نبقى فاهمين بعض وندي بعض اكتر من فرصة …

ولو انت عندك حلم , يبقى لازم يبقى عندك اصرار تكمله وابداع تشكله بيه ♥

وتبقى عارف ان كلمه اصرار وحلم يعني تعب ومجهود ومعافرة وصبر …

بس طالما انت بتحب و مؤمن بحلمك وعارف انه يستاهل , هتكمل في مشوارك ورحلتك لتحقيق حلمك للنهاية …

وفي الرحلة بنبقى محتاجين شخص جمبنا يسندنا ويساعدنا ويشجعنا , ولو دورت شوية حواليك ممكن تلاقيه …

وطالما انت عندك كل ده يبقى رحلتك لازم تبتدي وجاهزة للانطلاق

يلا ابتدي … حلمك مستنيك ♥

اقرأ أيضاً  ميجامايند

التعليقات

التعليقات


آراء القراء

اترك تعليقك

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.


Current track
Title
Artist

Background